பதிவுகள்

பதிவுகள் 

அதிகாலைக்  கனவுகள் போன்றன 

நான் கொண்ட காதல்கள்...

முடிவு அறியுமுன்னமே 

விடிந்து விடுகிறது 

அல்லது 

விழிப்புத் தட்டி விடுகிறது... 

 *

எனது காதல்களும் 

நம் தேசத்துக் கல்வித்திட்டமும் 

சற்றேறக் குறைய சமம்..

தீட்டப்படுவதும் 

திருத்தப்படுவதுமாய்..

ஆனால்,

ஒவ்வொரு தடவையும் 

மதிப்பிடுதலில் தோல்வி தான்!

*

ஒவ்வொரு காதலின் போதும் 

உருவாக்கப் படுகிற 

பெயர்ச் சுருக்க  சங்கேதங்கள்  

ஆவர்த்தன அட்டவணையின் 

தனிமங்களை விட  அதிகம்..

*

எனது பிரத்யேக காதல் மொழி 

ஒலி வடிவத்துக்கு ஒத்து வராமல் 

வரி வடிவத்தில் மட்டுமே 

வார்த்தைகள் கோர்ப்பது... 

தினக் குறிப்புகளின் ஏடுகளில் 

மௌனமாய்  உறைகிறது  

இன்னும்

குட்டி போடாத 

பால்யத்தின் மயிலிறகுகளுடன்..  

*

நேற்றைய   காதல்கள்

அற்ப ஆயுளில் முடிந்து போயினும் 

அத்தனை சுலபமாய் 

அழிவதில்லை 

அவைதம் சுவடுகள்...

 *

சரித்திரச் சான்றாவன 
வெளிப்படுத்திய காதல்கள் 

கடிதங்களாய்..

காவியமாய்..

கல்வெட்டாய்.. 

 *
எனில் 

சொல்லாத காதல்கள்..?

சூசகமாய் பதிவாகும்

மின்னஞ்சல் முகவரியின் 

கடவுச் சொல்லாகவேனும்!

ப்ரிய சகி

சகியே... 

உன் மீது கொண்ட 

எனதான ஸ்நேகம்

உயிர்கொல்லி காதலாய்

நிலை மாறியது எப்பொழுது?

*

சீருடையில் நிலவாக 

நீ குடை பிடித்து நின்றது 

சிற்பமாய் என் நெஞ்சில்

செதுக்கப் பட்ட பொழுதா?

*

கணக்கியல் புத்தகத்தின்

கடைசிப் பக்கங்களில்

அனிச்சையாய் உன் பெயர்

கிறுக்கப் பட்ட பொழுதா?

*

அர்த்த ராத்திரியில் 

அறை இருளில் அவஸ்தையாய்

கவிதை  எழுதவென

கண் விழித்த பொழுதா?

* 

முன்நெற்றி முடிச்சையும் 

முந்தானை மடிப்பையும்

முழுசாக  உள்மனதில்

குறிப்பெடுத்த பொழுதா?

*

தெற்றுப்பல் தெரிய

தேன்மொழியாள் புன்னகைக்க 

தெவிட்டாத தித்திப்பில் நான் 

திளைத்த பொழுதா?

*

உனது வலது கன்னத்தில் 

மச்சமாய் ஜ்வலிக்கும் 

அந்த  ஒற்றைப்புள்ளி கண்டு 

எனது  முற்றுப்புள்ளிகள்

முடிவிலியாய் மாறிய பொழுதா? 

*

சுவாசத்தில் அக்னியும்

பார்வையில் ஈரமும்

ஒரு சேர உருவாகும்

முரண்பாட்டு விதிகள் 

முளைத்த பொழுதா? 

*

உனக்காக மட்டுமே 

எதிர் பார்த்துக் காத்திருந்த

என் ஞாபகப் பதிவேட்டில் 

நீ கோலமிட்ட பொழுதா?

*

உன் விழியீர்ப்பு மய்யம் 

எனை உள்வாங்கிக் கொண்ட

அந்த கடைசி நாள் சந்திப்பின்

கற்புள்ள நிமிஷத்தின் பொழுதா?

*

விடிந்தால் தேர்வு என்ற 

விறைப்பான ராத்திரியில் 

அறைகுறை ஆங்கிலத்தில் - நான்
அன்புமடல் வரைந்த பொழுதா?

*

ஆரம்பப் புள்ளி எது

அறுதியிட முடியவில்லை

சமாந்தரக் கோடுகளோ

சந்திக்க நேர்வதில்லை...

*

கண்டேன் - நீயே 

காட்சி என்றானாய் 

கேட்டேன் - நீயே 

இசையானாய்

ரசித்தேன் - நீயே

ருசி என்றானாய் 

முகர்ந்தேன் - நீயே

 (ஸ்)வாசமென்றானாய்

நினைத்தேன் - நீயே 

வலியும், ஆனாய்... 

********

சீருடையில் நிலவு..

சிகை முடிக்க நக்ஷத்ரம்..

மழை ஓய்ந்த வானமாய்

மனசு மட்டும் வெறுமையாய்....

********

ஸ்தூலம் ப்ராணம்

ஸ்நேகம்  ரோகம்

ஸ்பர்ஷம் விஷம்

ஸ்படிக துல்யம்

ஸ்வர்க்கம் நரகம்

ஸ்தல ப்ரத்யட்சம் 

********
*